ജീവന്റെ വിലയുള്ള ജനകീയ പ്രതിരോധങ്ങൾ

plac-copy

പ്ലാച്ചിമട ഒരു പ്രതീകമാണ്‌, ഒരുദാഹരണമാണ്. നാടിന്റെ നാരായവേരറുക്കാൻ ത്രാണിയുള്ള ഒരു കോർപ്പറേറ്റ് അതികായനെ എങ്ങനെയാണ് ഒരു ജനതയുടെ സുധീരമായ ചെറുത്തുനിൽപ്പ് കെട്ടുകെട്ടിച്ചത് എന്നതിന്റെ ഉത്തമോദാഹരണം. പ്ലാച്ചിമടക്കാരുടെ ഈ പ്രതിരോധത്തിന് അവരുടെ ജീവന്റെ വിലയുണ്ടായിരുന്നു. അത് കൊണ്ട് തന്നെ അവർക്ക് ഈ സമരം ജയിച്ചേ മതിയാകുമായിരുന്നുള്ളൂ.

നാടിന്റെ പരിസ്ഥിതിയെയും ജൈവസമ്പത്തിനേയും ജലവിഭവങ്ങളെയും താറുമാറാക്കാൻ പോന്ന പദ്ധതികൾ, വികസനത്തിന്റെയും തൊഴിൽ ലഭ്യതയുടെയും കപട മുഖംമൂടി അണിഞ്ഞു ജനങ്ങളെ വഞ്ചിക്കാൻ തുടങ്ങിയിട്ട് കാലമേറെയായി. വേണ്ടത്ര മുൻ പഠനങ്ങളില്ലാതെ പല വാണിജ്യ ഭീമന്മാർക്കും അവരവരുടെ സംരംഭങ്ങൾ ആരംഭിക്കാൻ പച്ചക്കൊടി കാണിക്കുന്നത് ഉത്തരവാദപ്പെട്ട ഭരണത്തലവന്മാർ തന്നെയാണ്. ഒരു പ്രദേശത്തെ ഭൂസമ്പത്തു അവിടത്തെ ജനങ്ങൾക്ക് കൈകാര്യം ചെയ്യാനും സംരക്ഷിക്കാനും വേണ്ടിയുള്ളതാണെന്ന കേവലമായ യാഥാര്‍ത്ഥ്യത്തെപ്പോലും കാറ്റില്‍പ്പറത്തിയാണ് സര്‍ക്കാര്‍ പ്രത്യക്ഷത്തില്‍ ഇത് പോലെയുള്ള കമ്പനികള്‍ക്ക് പ്രവര്‍ത്തനാനുമതി നല്‍കുന്നത്. ഇത് നാടിനും നാട്ടാർക്കും ദൂരവ്യാപകമായ കഷ്ടനഷ്ടങ്ങൾ ക്ഷണിച്ചു വരുത്തുമെന്ന പരിസ്ഥിതി സംഘടനകളുടെ ഉപദേശം പോലും പലപ്പോഴും അവർ ചെവിക്കൊള്ളാറില്ല.

ഇങ്ങനെയൊരു സന്ദർഭത്തിലാണ് പെരുമാട്ടി പഞ്ചായത്തിലെ പ്ലാച്ചിമട എന്ന ഗ്രാമത്തിൽ കൊക്കക്കോള കമ്പനി രംഗപ്രവേശം ചെയ്തത്.അധികം വൈകാതെ തന്നെ നാട്ടുകാർ അതിന്റെ ഭവിഷ്യത്ത്‌ തീരിച്ചറിയാൻ തുടങ്ങി. കിണറുകളിലെ ജലവിതാനം താഴ്ന്നുകൊണ്ടിരുന്നപ്പോളും കമ്പനിയെ ആരും തുടക്കത്തിൽ സംശയിച്ചിരുന്നില്ല. ക്രമവും സൂക്ഷ്മവുമായ പഠനങ്ങളെത്തന്നെ ആശ്രയിച്ചാണ് പ്രതിയെ സ്ഥിരീകരിച്ചത്. ഇവിടെയാണ് പരിസ്ഥിതി സാക്ഷരതയുടെ പ്രാധാന്യം. ഞാൻ മനസ്സിലാക്കുന്നത് “പഠിപ്പും വിവരവുമില്ലാത്തവർ” എന്ന അപകർഷവും പേറി, വികസനവിരോധികൾ എന്ന് മുദ്ര കുത്തപ്പെടുമോ എന്ന് പോലും ശങ്കിച്ച്, പാർശ്വവത്കരിക്കപ്പെടുന്ന, അല്ലെങ്കിൽ പാർശ്വവത്കരിക്കപ്പെട്ടേക്കാവുന്ന വലിയൊരു വിഭാഗം ജനങ്ങൾ ഇന്ന് ഇന്ത്യയുടെ പല ഭാഗങ്ങളിലും ജീവിക്കുന്നുണ്ട്.ഈ ബോധത്തെയാണ് കുത്തകഭീമന്മാരും കോർപ്പറേറ്റുകളും കാലാകാലങ്ങളായി ചൂഷണം ചെയ്തു കൊണ്ടിരിക്കുന്നത്.

ആഗോളതലത്തിൽ തന്നെ മേല്പറഞ്ഞ പ്രവണതക്ക് ഉദാഹരണങ്ങളുണ്ട്. അതേ കാരണത്താൽ, കായികമായി അടിച്ചമർത്തുന്നതിനെക്കുറിച്ചു ചിന്തിക്കുന്നതിനു വളരെ മുൻപ് തന്നെ അവർ ഈ പാവങ്ങളുടെ പൊതുബോധത്തെ മാനസികമായി അടിച്ചമർത്തുന്നു. അതോടെ കാര്യങ്ങൾ അവർക്കു കുറേക്കൂടി എളുപ്പമാകുന്നു.

സംഗതികളിങ്ങനെയൊക്കെയാണെങ്കിലും കേരളത്തിലെ രാഷ്ട്രീയപ്രവർത്തകർക്കിടയിൽ കക്ഷിരാഷ്ട്രീയഭേദമന്യേ ഉയർന്ന ബൗദ്ധികനിലവാരവും സ്വാർത്ഥലാഭേച്ഛയില്ലാത്തവരുമായ പലരും ഉള്ളത് ആശാവഹമാണ്. അത് പോലെ തന്നെ സമൂഹത്തിന്റെ നാനാതുറകളിലുള്ള കലാസാഹിത്യസാംസ്കാരികരംഗത്തെ പ്രമുഖരുടെ ദേശീയ ശ്രദ്ധയോ, ആഗോള ശ്രദ്ധ തന്നെയോ ആകർഷിക്കാൻ പോന്ന ഇടപെടലുകൾ നടക്കുന്നതും പ്രതീക്ഷയുണർത്തുന്നതാണ്.

അങ്ങനെ എല്ലാവരും ഒരൊറ്റ ചിന്തയോടെ, ഒരൊറ്റ മനസ്സോടെ സദാ ഉണർന്നു പ്രവർത്തിച്ച സമരമനസ്സാണ് പ്ലാച്ചിമടയുടേത്. ഈ ജനകീയ പ്രതിരോധത്തിന് അവരുടെ ജീവന്റെ-ഒരു പക്ഷെ അതിനേക്കാൾ വിലയുണ്ട്. അത് കൊണ്ട് തന്നെയാണ് പ്ലാച്ചിമട മഹത്തായ അതിജീവനത്തിന്റെ പാഠമായി ലോകഭൂപടത്തില്‍ തലയുയർത്തിതന്നെ നില്കുന്നത്.

(Image courtesy : http://www.reporterlive.com)

രാഗവിചാരങ്ങള്‍ – 2

ragavicharangal_naatta_thyagaraja_thurannezhuthu

                                           വാത്സല്യരൂപിണീ നാട്ട

വാത്സല്യം തുളുമ്പുന്ന രാഗമാണ് നാട്ട രാഗം. ഒപ്പം ഭക്തിയും  പ്രതിഫലിപ്പിക്കുന്നു. ചടുലമായ കീര്‍ത്തനങ്ങളും ഗാനങ്ങളുമാണ് നാട്ടയില്‍ കണ്ടു വരാറുള്ളത്. വീരരസമാണ്  നാട്ട രാഗത്തില്‍ മുന്നിട്ട് നില്‍ക്കുന്നത്.

36മതു് മേളകര്‍ത്താരാഗമായ ‘ചലനാട്ട’യുടെ ജന്യരാഗമാണു് നാട്ട. ഋഷഭസ്വരമാണ് ജീവസ്വരം .
ആരോഹണം : സരിഗമപധനിസ
അവരോഹണം : സനിപമരിസ
.
ഏറെ സുപ്രസിദ്ധമായ “ജഗദാനന്ദകാരകാ” എന്ന ത്യാഗരാജകൃതി കേള്‍ക്കാത്തവര്‍ ചുരുക്കമായിരിക്കും. ശ്രീരാമന്‍റെ മഹത്വം പ്രകീര്‍ത്തിക്കുന്ന, ത്യാഗരാജസ്വാമികളുടെ
പഞ്ചരത്നകൃതിയിലെ ഈ കീര്‍ത്തനം സംഗീതം കൊണ്ട് മാത്രമല്ല സാഹിതീഗുണം കൊണ്ടും സമ്പന്നമാണ്. മറ്റു ത്യാഗരാജകൃതികളില്‍ നിന്ന് വ്യത്യസ്തമായി പൂര്‍ണമായും
സംസ്കൃതത്തിലാണ്‌ പ്രസ്തുത കൃതി രചിക്കപ്പെട്ടിട്ടുള്ളത്. അത് പോലെ തന്നെ മുത്തുസ്വാമി ദീക്ഷിതരുടെ മഹാഗണപതിം, സ്വാമിനാഥപരിപാലയ എന്നീ കൃതികള്‍
രചിച്ചിരിക്കുന്നതും നാട്ടയിലാണ്. നാട്ട ഒരു തൃസ്ഥായിരാഗമായി പറയപ്പെടാറുണ്ട്. ഗണേശ സ്തുതികള്‍ ഒരുപാട് നാട്ടരാഗത്തില്‍ ചിട്ടപ്പെടുത്തിയിട്ടുണ്ട്.

നാട്ട രാഗത്തില്‍ കുറേ ചലച്ചിത്രഗാനങ്ങള്‍ ഉണ്ട്. ‘ഇരുവര്‍’ എന്ന മണിരത്നം ചിത്രത്തിലെ “നറുമുഖൈയെ” എന്ന പാട്ട് നമ്മുടെ ഓര്‍മയില്‍ എക്കാലവും ഉണ്ടാവും.
കര്‍ണാടക സംഗീതത്തിന്റെ സാധ്യതകള്‍ സിനിമാപ്പാട്ടില്‍ സന്നിവേശിപ്പിക്കാന്‍ ഉള്ള എ ആര്‍ റഹ്മാന്റെ പ്രാഗത്ഭ്യം ഈ പാട്ടില്‍ കാണാം. ഉണ്ണികൃഷ്ണന്‍ പാടിയ ഭാഗം
നാട്ടയിലും ബോംബെ ജയശ്രീ പാടിയ ഭാഗം ഗംഭീരനാട്ടയിലുമാണ് ചെയ്തിരിക്കുന്നത്. വൈരമുത്തുവിന്‍റെ മനോഹരവരികള്‍ പാട്ടിന്റെ മാറ്റ് കൂട്ടുന്നു.
സംഗീതസംവിധായകന്‍ ദേവയുടെ പ്രിയപ്പെട്ട രാഗങ്ങളില്‍ ഒന്നായിരുന്നു നാട്ട. “ഭാഷ” എന്ന രജനിപ്പടത്തിലെ “തങ്കമകന്‍ ഇന്ട്രു” അതിനുദാഹരണമാണ്. അദ്ദേഹത്തിന്റെ
മകന്‍ ശ്രീകാന്ത് ദേവ “ചെന്നൈ സെന്തമിഴ്” (എം. കുമരന്‍ സണ്‍ ഓഫ് മഹാലക്ഷ്മി) എന്ന ഗാനം ചെയ്തിരിക്കുന്നതും നാട്ടയിലാണ്. മറ്റൊരു ജനപ്രിയ നാട്ട ഗാനമാണ്
“അയ്യന്‍ഗാര് വീട്ട് അഴകേ”. അന്യന്‍ എന്ന ഷങ്കര്‍ ചിത്രത്തിന് വേണ്ടി കമ്പോസ് ചെയ്തത് ഹാരിസ് ജയരാജ്‌.

മലയാളസിനിമയിലും കുറച്ചു പാട്ടുകളുണ്ട് നാട്ടയില്‍ – ‘ശ്രീരാമനാമം’ (നാരായം-ജോണ്‍സന്‍), ‘ഗോപാംഗനേ’ (ഭരതം-രവീന്ദ്രന്‍), ‘പൊന്‍പുലരൊളി പൂവിതറിയ’
(ഇത്തിരിപ്പൂവേ ചുവന്ന പൂവേ-രവീന്ദ്രന്‍), ‘തിരുവരങ്ങില്‍’ (ഉടയോന്‍-ഔസേപ്പച്ചൻ).

നാട്ടരാഗത്തിലെ ഗാനങ്ങള്‍ പാടി ഫലിപ്പിക്കാന്‍ പൊതുവേ ബുദ്ധിമുട്ടാണ്. ആലപിക്കാന്‍ നല്ല ശ്വാസനിയന്ത്രണവും വേണം.

 

സക്കറിയയുടെ തേൻ- മാജിക്കൽ റിയലിയസത്തിന്റെ ഉത്തരാധുനിക വേർഷൻ

then_sakkariah_cover

മലയാളത്തിന്റെ  പ്രിയ കഥാകാരനായ സക്കറിയ നർമ്മത്തിന്റെ മേമ്പൊടി ചേർത്ത് ഒരു സുന്ദരകഥ സമർപ്പിച്ചിരിക്കുകയാണ് –   തേൻ. പേരു പോലെ തന്നെ മാധുര്യമൂറുന്ന ഒരു കഥയാണ്  മാതൃഭൂമി ആഴ്ച്ചപ്പതിപ്പിൽ  പ്രസിദ്ധീകരിച്ച തേൻ. ലളിതസുന്ദരമായ വാക്കുകള്‍ കൊണ്ട് വായനക്കാരനെ ആഹ്ലാദിപ്പിക്കുന്ന കഥാകൃത്ത്‌ മധുരത്തോടൊപ്പം കാലിക പ്രസക്തമായ പല ആകുലതകളും വരച്ചുകാട്ടുന്നു .

ഒരു  മനുഷ്യസ്ത്രീയുടെ പ്രണയം കാമിച്ചു കഴിയുന്ന നിഷ്കളങ്കഹൃദയനും സുന്ദരനും അരോഗദൃഢഗാത്രനുമായ ഒരു കരടിയാണ് കഥാനായകന്‍. സസ്യലതാദി-ജന്തു ജീവി വൈവിധ്യങ്ങളാല്‍ സമ്പുഷ്ടമായ കാട് ആണ് കഥാപശ്ചാത്തലം. കഥയില്‍  ഇഴജീവികളും ഇരുകാലികളും തമ്മിലുള്ള താരതമ്യനിരീക്ഷണം ശ്രദ്ധിക്കുക: “ഇവരും നാമുമായി രണ്ടു പ്രധാന വ്യത്യാസങ്ങളുണ്ട്. ഒന്ന് ഇവര്‍ വാലാട്ടുന്നത് യുദ്ധക്കളത്തിലും ഇരപിടിക്കുമ്പോഴും  പ്രണയിക്കുമ്പോളുമാണ്. നമ്മള്‍ വാലാട്ടുന്നത് മന്ത്രി, മതാധികാരി തുടങ്ങിയവരെ കാണുമ്പോഴാണ്. നാം ഇഴയുന്നതും അപ്പോഴാണ്‌. ഇവര്‍ ഇഴയുന്നത് ജീവിതവുമായി മുന്നോട്ട് പോകാനാണ്.”

തന്റെ കാമിനിയെ കണ്ടെത്തുന്നതിലുള്ള ആശയക്കുഴപ്പങ്ങളുമായി കരടി ദൈവത്തിനെ സമീപിക്കുകയാണ്. ഈ ഭാഗത്ത്‌, ബഷീര്‍ക്കഥയിലെ “സ്ഥലത്തെ പ്രധാന ദിവ്യ”നായ കണ്ടമ്പറയനിലേക്ക് ദൈവത്തിനെ ആരോപിച്ച് കൊണ്ട് വായനക്കാരെ കുറച്ചു സമയം നൊസ്റ്റാള്‍ജിക്ക് ആക്കുന്നു സക്കറിയ. ശേഷം ദൈവത്തിന്റെ അരുളപ്പാട് വ്യാഖ്യാനിച്ചു, ഒരു തേന്‍കൊതിച്ചിപെണ്ണ്  ആയിരിക്കണം  തന്റെ ഇണ എന്ന് കരടി തീരുമാനിക്കുന്നു. അങ്ങനെ തേന്‍ കൊതിച്ചിയും സര്‍വാംഗസുന്ദരിയുമായ ഒരു പെണ്ണിനെ കണ്ടു പിടിക്കുന്നു നായകന്‍. അങ്ങനെ പ്രണയവിവശനായ കരടിക്ക് മനുഷ്യസ്ത്രീയോടു സംവദിക്കാന്‍ മനുഷ്യഭാഷയും മനുഷ്യഭാവവും കൈവരുന്നു.  ഭീകരസത്വങ്ങളെപ്പോലും ദേവകിന്നരന്മാരാക്കുന്ന ശക്തിയാണല്ലോ പ്രണയം!

പക്ഷെ സുന്ദരിനായിക നവകേരള പെണ്തലമുറയുടെ പ്രതീകമാണ്. വളരെ സെലെക്ടീവ് ആണ് അവള്‍. അവളുടെ ആദര്‍ശ പുരുഷ സങ്കല്പങ്ങള്‍ തന്നെ ഇപ്പറഞ്ഞതിനുദാഹരണമാണ്. എന്നിരുന്നാലും സദ്ഗുണസമ്പന്നനും മാനുഷികമായ യാതൊരു ദുശീലമില്ലാത്തവനും  സര്‍വ്വോപരി വന്യമായി  ഭോഗിക്കുന്നവനുമായ  കരടിയെ വേള്‍ക്കാന്‍ ഏത് പെണ്ണാണാഗ്രഹിക്കാത്തത്!

കഥയ്ക്ക്‌ ഇല്ലസ്ട്രേഷന്‍ ചെയ്തിട്ടുള്ള ദേവപ്രകാശിന്റെ വര്‍ണശബളമായ ചിത്രങ്ങള്‍ കാടിന് മിഴിവേകുന്നു. കരടിയുടെ പ്രണയവും പ്രതീക്ഷയും തുളുമ്പുന്ന കണ്ണുകള്‍ വരച്ച  ദേവപ്രകാശ് തീര്‍ച്ചയായും അഭിനന്ദനമര്‍ഹിക്കുന്നുണ്ട്. ആഖ്യാനരീതിയിലെ വ്യത്യസ്ഥതകള്‍ കൊണ്ട് മലയാളികളെ എക്കാലത്തും വിസ്മയിപ്പിച്ച കഥാകാരന്‍ “തേന്‍” എന്ന തന്റെ പുതിയ കഥയിലും  വേറിട്ട ഒരു ശൈലി സ്വീകരിച്ചിരിക്കുന്നു. മാജിക്കല്‍ റിയലിസത്തിന്റെ ഒരു ഉത്തരാധുനിക വെര്‍ഷന്‍ ആയി തോന്നി ഈ കഥ. കരടി, മനുഷ്യപെണ്ണിനെ കല്യാണം കഴിക്കുന്നതിനെപ്പറ്റിയുള്ള അമേരിന്ത്യന്‍ ഗോത്രകഥകളെ ഓര്‍മിച്ചു കൊണ്ട് എഴുതിയ “തേനി”നെ പോലെ മധുവൂറും കഥകള്‍ ഇനിയും സക്കറിയയില്‍ നിന്നും പ്രതീക്ഷിക്കുന്നു.

This slideshow requires JavaScript.

പഴമൊഴിയും പുതുമൊഴിയും!

ഒന്നേയുള്ളെങ്കില്‍ ഒലക്കക്കടിച്ചു വളര്‍ത്തണമെന്നു പഴമൊഴി,

ഉള്ളയൊന്നിന്റെ  കയ്യില്‍നിന്നും ഒലക്കക്കടി കിട്ടാതെ നോക്കലെന്ന്‍ പുതുമൊഴി!

രാഗവിചാരങ്ങള്‍ – 1

photocredits-music-castle-in

ആഹ്ലാദപ്രദായിനി രീതിഗൌള  🙂

മനസ്സില്‍ ആഹ്ലാദാതിരേകത്തിന്റെ അലയൊലികള്‍ തീര്‍ക്കുന്ന രാഗമാണ് രീതിഗൌള. അളവറ്റ ആര്‍ദ്രതയോടെ ഒരു കാമിനി തന്റെ പ്രാണപ്രിയന്റെ കാതില്‍ മന്ത്രിക്കുന്ന മധുരത്തേന്‍മൊഴികളായും, മറ്റു ചിലപ്പോള്‍, പിരിയാന്‍ നേരമായിട്ടും മധുവൂറും മുഹൂര്‍ത്തങ്ങള്‍ മതിയാകാതെ തെല്ലിട കൂടി കാത്തു നില്ക്കാന്‍ പ്രേയസിയോട് കെഞ്ചുന്ന കാമുകസ്വരമായുമാണ് രീതിഗൌളയില്‍ ചിട്ടപ്പെടുത്തിയ ഗാനങ്ങള്‍ കേള്‍ക്കുമ്പോള്‍ എനിക്ക്‌ അനുഭവപ്പെടാറുള്ളത് .

ഇരുപത്തിരണ്ടാമതു മേളകര്‍ത്താരാഗമായ ഖരഹരപ്രിയയുടെ  ജന്യരാഗമാണ് രീതിഗൌള .

ആരോഹണം      :     സഗരിഗമനിധമനിനിസ
അവരോഹണം :      സനിധമഗമപമഗരിസ

കര്‍ണാടകസംഗീതശ്രേണിയിലേക്ക്  കടന്നാല്‍ രീതിഗൌളയില്‍ എനിക്കേറ്റവും പ്രിയം  പ്രസിദ്ധ സ്വാതിതിരുനാള്‍ കൃതി “പരിപാലയമാം ശ്രീ പദ്മനാഭ മുരാരേ” ആണ്. മുത്തുസ്വാമി ദീക്ഷിതരുടെ “ശ്രീ നീലോല്പലനായികേ” എന്ന കൃതിയും അതിസുന്ദരമായ മറ്റൊരു കമ്പോസിഷനാണ്.

എന്‍റെ തലമുറയ്ക്ക്  ഏറ്റവും സുപരിചിതവും എനിക്ക്‌ പ്രിയപ്പെട്ടവയുമായ രണ്ടു രീതിഗൌള സിനിമാ ഗാനങ്ങളാണ് “അഴകാന രാക്ഷസിയേ” (മുതല്‍വന്‍), “കണ്‍കള്‍  ഇരണ്ടാല്‍”  (സുബ്രഹ്മണ്യപുരം) എന്നിവ.  മലയാളസിനിമയിലും കുറേ ഉദാഹരണങ്ങളുണ്ട്- ഒന്നാം രാഗം പാടി (തൂവാനത്തുമ്പികള്‍- പെരുമ്പാവൂര്‍ ജി രവീന്ദ്രനാഥ്), പ്രണതോസ്മി ഗുരുവായുപുരേശം (സിന്ദൂരരേഖ -ശരത്), കണ്ടു ഞാന്‍ (അഭിമന്യു – രവീന്ദ്രന്‍), മാമവമാധവ മധുമാതി (ഫൈവ് സ്റ്റാര്‍ ഹോസ്പിറ്റല്‍- ബോംബെ രവി), വരവായി തോഴി വധുവായി (അരികെ – ഔസേപ്പച്ചന്‍) എന്നിവ അവയില്‍ ചിലത് മാത്രം.

ഇശൈജ്ഞാനി ഇളയരാജയുടെ ഗാനങ്ങളാണ് രീതിഗൌളയില്‍ തമിഴ്ചലച്ചിത്രഗാനശാഖ യില്‍ കൂടുതലും ഉള്ളത്. ഇളയരാജ ഈണമിട്ട് എം . ബാലമുരളീകൃഷ്ണ ആലപിച്ച “ചിന്നക്കണ്ണന്‍ അഴൈകിറാന്‍” (കവിക്കുയില്‍) എന്ന പാട്ട് കേള്‍ക്കാത്തവര്‍ ചുരുക്കമായിരിക്കും. അത് പോലെ തന്നെ സ്വാതിമുത്യം എന്ന തെലുങ്ക് ചിത്രത്തിലെ, എസ്. പി. ബി പാടിയ “രാമാകനവേ മിരാ” മറ്റൊരു ഇളയരാജ ഹിറ്റാണ്. സുടും നിലവു (തമ്പി – വിദ്യാസാഗര്‍), കാതല്‍ നേരുപ്പേന്‍ (വെയില്‍- ജി.വി. പ്രകാശ്‌ കുമാര്‍) എന്നിവയാണ് പിന്നെ ഓര്‍മയിലേക്ക് വരുന്ന മറ്റു ഗാനങ്ങള്‍.

കര്‍ണാടിക് റോക്ക് ബാന്‍ഡ് ആയ ‘അഗം’ കമ്പോസ് ചെയ്ത ‘മിസ്റ്റിക്കല്‍ ആഭേരി’ രീതിഗൌളയുടെയും ആഭേരിയുടെയും ഒരു മനോഹര ബ്ലെന്‍ഡിംഗ് ആണ്.

വളരെ   സ്ട്രിക്റ്റ് ആയ ഒരു രാഗമാണെങ്കില്‍ക്കൂടിയും ലളിതസുന്ദര നിര്‍മിതികളാണ് നമ്മുടെ സംഗീതജ്ഞര്‍ രീതിഗൌളയില്‍ സമ്മാനിച്ചിരിക്കുന്നത്. കണ്ണുകളച്ച് ഈ രാഗത്തിന്റെ ആരോഹണവരോഹണങ്ങളുടെ ലയമാധുരിയില്‍ മതിമറക്കുമ്പോള്‍ അനിര്‍വചനീയമായ ഒരു അതീന്ദ്രിയാനുഭൂതി തന്നെയാണ് എന്ന് പറഞ്ഞാല്‍ അതിശയോക്തിയില്ല.

PC: musiccastle.in

പെണ്‍കുട്ടിയെ (ആണ്‍കുട്ടിയെയും) പഠിപ്പിക്കേണ്ടത്..

photocredits-pulpghouls-clearcut

നമ്മുടെ പെണ്‍കുട്ടികളെ തന്റേടമുള്ള  സ്ത്രീകളാക്കി പാകപ്പെടുത്തുന്ന ഒരു സാമൂഹിക ചുറ്റുപാട് വരണം. രാത്രിയും ഇരുട്ടും എത്ര മേല്‍  ആണുങ്ങളുടെതാണോ അത്ര തന്നെ പെണ്ണുങ്ങളുടേതുമാണെന്ന് അവരെ പഠിപ്പിക്കണം. രാത്രിയിലെ, ഇരുളിലെ കാട്ടുമാക്കാന്‍-കോക്കാന്‍പൂച്ചപ്പേടികള്‍ കുത്തി വെക്കാതെ അവരെ അപകടങ്ങള്‍ക്കെതിരെ ജാഗരൂകരാക്കാന്‍ പ്രാപ്തരാക്കണം.

രാത്രിയില്‍ കടവാവലുകള്‍ മാത്രമല്ല, മനോഹരപൌര്‍ണമികളും  ആമ്പല്‍പ്പൂവിടരലുകളും മുല്ലപ്പൂവാസനകളും മിന്നാമിന്നിക്കൂട്ടങ്ങളും ഉണ്ടെന്നു പറഞ്ഞു കൊടുക്കണം. ഇരു കൂട്ടര്‍ക്കും ലിംഗസമത്വതിന്റെയും  പരസ്പരബഹുമാനത്തിന്റെയും സൗഹാര്‍ദ്ദത്തിന്റെയും പാഠങ്ങള്‍ പകര്‍ന്നു കൊടുക്കണം. ഒപ്പം തന്നെ അതിര്‍വരമ്പുകള്‍ കെട്ടേണ്ടിടത്ത് കൃത്യമായി അതിര്‍വരമ്പുകള്‍ കെട്ടാനും അവയെ അതിലംഘിക്കാന്‍ ആരെയും അനുവദിക്കാതിരിക്കാനും അവരെ പഠിപ്പിക്കണം.

പ്രതിരോധത്തിന്റെ പാഠങ്ങള്‍ ചെറുപ്പത്തിലേ അവരെ പഠിപ്പിക്കണം. രാത്രിയെന്നോ പകലെന്നോ ഇല്ലാതെ തങ്ങളുടെ നേര്‍ക്ക്‌ നീളുന്ന കാമവെറിക്കണ്ണുകളില്‍ കനല്‍നോട്ടങ്ങളുടെ കഠാര കുത്തിയിറക്കാന്‍ അവരെ ബോധ്യപ്പെടുത്തണം.

തങ്ങള്‍ക്കു നേരെ നീളുന്നത് സഹായ ഹസ്തങ്ങളാണെങ്കില്‍ സ്വീകരിക്കാനും കരാളഹസ്തങ്ങളാണെങ്കില്‍ അരിഞ്ഞു കളയാനും അവളുടെ കൈകള്‍ക്ക് കരുത്തു പകരണം. ആണിടങ്ങളോ പെണ്ണിടങ്ങളോ അല്ല, മറിച്ചു പൊതു ഇടങ്ങളാണ് ഉണ്ടാകേണ്ടത് എന്ന് വരും തലമുറക്കെങ്കിലും പറഞ്ഞു കൊടുക്കണം. സര്‍വോപരി ഒരു നാണയത്തിനു രണ്ടു വശങ്ങളുണ്ടെന്നും നിഷ്കളങ്കരായ പുരുഷഹൃദയങ്ങളെ ചൂഷണം ചെയ്യരുതെന്നും അവരെ പ്രത്യേകം പഠിപ്പിക്കണം!

[PC: pulpghouls-clearcut]

പൊങ്ങാനന്ദം!

പൊങ്ങാനന്ദം!
പൊങ്ങാനന്ദം!

 

സ്വന്തം പറമ്പിലെ മുഴുമൂപ്പെത്തിയ
നാളികേരങ്ങള്‍ പൊതിച്ച്‌,
അതിലെ പൊങ്ങ് ചുരണ്ടി
വീട്ടുകാര്‍ക്കൊപ്പം പങ്കിട്ടു കഴിക്കുന്ന
ആനന്ദം ഏതെങ്കിലും ഫുഡ്‌ കോര്‍ട്ട് ലെ
ബര്‍ഗര്‍നോ പീറ്റ്സക്കോ തരാന്‍ പറ്റുമോ?